مرد سر ننگا کر کے (خواتین سر ڈھک کر) مسنون نیت کریں۔ زبان سے الفاظ ادا کرنا ضروری نہیں، دل کا ارادہ کافی ہے۔

“میں عمرہ کے لیے حاضر ہوں“

یا

“اے اللہ میں آپ کی رضا کے لئے عمرہ کا ارادہ کرتا / کرتی ہوں آپ اسے میرے لئے آسان فرما دیجئے اور قبول فرما لیجئے“

نیت کرتےہی مرد زرا بلند آواز سے اور عورتیں آہستہ آواز میں تین بار یہ پڑھیں (زبان سے کہنا شرط ہے، کم ازکم ایک مرتبہ کہنا فرض ہے)

“حاضر ہوں اے اللہ ! میں حاضر ہوں تیرا کوئی شریک نہیں میں حاضر ہوں ۔بے شک حمد تیرے ہی لائق ہے ساری نعمتیں تیری ہی دی ہیں، بادشاہی تیری ہی ہے اور تیرا کوئی شریک نہیں۔“

تلبیہ پڑھتےہی آپ پر احرام کی پابندیاں شروع ہو گئیں۔ احرام کی پابندیاں سے متعلق تفصیل احرام اور متعلقہ احکامات کے صفحے پر دیکھیے۔

کسی بھی کتاب سے سفر کی مسنون دعائیں پڑھیں۔

زیادہ سے زیادہ تلبیہ پڑھتے رہیں۔ ذکر الہی اور دیگر دعائیں کرتے رہیں۔فضول کلام اور شکوہ شکایت زبان پر نہ آنے دیں۔

ذوق و شوق، عظمت و محبت، اور عاجزی کے ساتھ لبیک پڑھتے اور دعائیں مانگتے ہوئے داخل ہوں۔

وضو کرکے مسجد الحرام میں داخل ہوں۔ پہلے سیدھا پاؤں اندر رکھیں اور مسجد میں داخل ہونے کی دعا پڑھیں۔

“اللہ کے نام کے ساتھ اور درود و سلام رسول اللہ صلی اللہ علیہ وسلم پر۔ اے اللہ میرے لئے اپنی رحمت کے دروازے کھول دے۔“

پھر یہ کہیں:

“اے اللہ میں جتنی دیر اس مسجد میں رہوں اتنی دیر کے لئے اعتکاف کی نیت کرتا/ کرتی ہوں“

دونوں ہاتھ اٹھا کر خوب دعائیں مانگیں کیونکہ یہ دعا کی قبولیت کا خاص موقع ہے۔

پاک اور باوضو ہونا ضروری ہے۔ نیز لباس مکمل سترکو ڈھانپے ہوئے ہونا چاہیے۔ طوافِ عمرہ کرنے سے قبل تلبیہ پڑھنا بند کر دیں۔ مرد حضرات اضطباع کر لیں (یعنی سیدھا بازو چادر سے نکال لیں)اضطباع ہراس طواف میں سنت ہے جس کے بعد سعی کی جائے۔

حجر اسود کی سیدھ میں کھڑے ہوں اور خانہ کعبہ کی طرف منہ کرکے نیت کریں

“اے اللہ میں آپ کی رضا کے لئے عمرہ کے طواف کی نیت کرتا/ کرتی ہو آپ اس کو میرے لئے آسان فرما دیجئے اور قبول فرما لیجئے۔“

بسم اللہ اللہ اکبر یا صرف اللہ اکبرکہتے ہوئے حجرِ اسود کی طرف ہتھیلیوں سے چھونے کا اشارہ کیجئے یہ حجرِ اسود کے استلام کی ایک شکل ہے۔

کعبہ شریف کو بائیں طرف رکھتے ہوئے طواف شروع کردیں۔ (طواف قدوم یا پہلے عمرہ کے طواف میں مرد تین چکروں میں رمل کریں گے رمل سے مراد کندھے اکڑ کر تیز تیز اور چھوٹے چھوٹے قدم اٹھانا ہے۔) عورتیں رمل نہیں کریں گی۔ حطیم کے باہر سے طواف کریں۔

تیسرا کلمہ، چوتھا کلمہ، قرآن کی تلاوت یا کوئی بھی دعائیں دیکھ کر یا زبانی پڑھی جاسکتی ہیں۔ رکنِ یمانی پر یہ دعا پڑھنا مسنون ہے۔

“اے اللہ! میں آپ سے دنیا اور آخرت میں درگزر (معافی) اور عافیت کا سوال کرتی / کرتا ہوں“۔

رکنِ یمانی سے حجرِ اسود تک درج ذیل دعا پڑھنا مسنون ہے۔

“اے اللہ! ہمیں دنیا کی بھلائیاں بھی عطا کیجیے اور آخرت کی بھی۔ اور ہمیں آگ کے عذاب سے بچا لیجئے۔“

اسی طرح چلتے چلتے جب آپ دوبارہ حجر اسود د کے سامنے پہنچیں گے تو ایک چکر پورا ہوگا۔ تین چکر کے بعد رمل بند کر دیں اور باقی چار چکر اپنی عام رفتار سے چلیں۔

اب مرد حضرات اضطباع ختم کر دیں۔ یعنی سیدھا کندھا بھی ڈھک لیں۔

مقام ابراہیم پر یا مسجد میں جہاں آسانی سے جگہ ملے طواف کے بعد دو رکعت واجب نماز ادا کریں۔پہلی رکعت میں سورہ کافرون اور دوسری رکعت میں سورہ اخلاص پڑھنا مسنون ہے۔ اس کے بعد دعا مانگیں۔

اب ملتزم پر جانا افضل ہے ۔ملتزم بھی قبولیتِ دعا کے مقامات میں سے ہے۔ مرد ملتزم سے چمٹ کر دعا مانگ سکتے ہیں۔ خواتین کو دور سے دعا مانگنی چاہیے۔

قبلہ رخ کھڑے ہو کر بسم اللہ پڑھ کر سیدھے ہاتھ سے پیٹ بھر کر آب زمزم پینا سنت ہے۔ اور یہ دعا پڑھیں

“اے اللہ میں آپ سے علمِ نافع کی/ کا سائل ہوں کشادہ روزی چاہتی/ چاہتا ہوں اور ہر مرض سے شفاء کی / کا طالب ہوں۔“

اب سعی کے لئے روانہ ہوتے وقت ایک بار پھر دور سے حجر اسود کا استلام کریں اور صفا پہاڑی کی طرف چلیں۔