حرم فورم ٹرسٹ پاکستان

بہت عرصے سے امتِ مسلمہ کے حالات اور اس کے تناظر میں مستقبل کے اندیشے اس امر پر بار بار متوجہ کر رہے تھے کہ ارکانِ اسلام اور عبادات کے مقاصد اور روح کو سمجھنے کی ضرورت ہے۔ اسی طرح مسلمانوں کی کردار سازی اور سیرت کی ازسرِ نو تعمیر کی بھی ضرورت ہے۔

حضرت ابراہیمؑ کو خانہ کعبہ کی ازسرِ نو تعمیر کا حکم دینے کے ساتھ، انسانوں کو ایک مرکز پر جمع ہو کر عبادت کرنے کا حکم دیا گیا۔ تاکہ مسلمان حج و عمرے کے مناسک ادا کرتے ہوئے حج کی روح و مقصد کو بھی سمجھیں اور اسلام کے آفاقی پیغام امن و اخوت اور بھائی چارہ کا نہ صرف مظاہرہ کریں بلکہ یہاں سے وہ قوت حاصل کر سکیں جو اپنے اپنے مقام پر واپس جاکر ان کی عملی زندگی میں ایسی تبدیلی لاسکے جو اسلام کو زندہ کرنے اور اتحادِ امت کا باعث بن سکے۔

حرم فورم ”دعوۃ اکیڈمی“ سے سند یافتہ ماسٹر ٹرینر تیار کراتا ہے، پھر ان ماسٹر ٹرینرز کے ذریعے ملک بھر کے حاجی کیمپس میں نہ صرف سرکاری گروپس کے ذریعے جانے والے عازمینِ حج کی تربیت کی جاتی ہے بلکہ ملک کے مختلف مقامات اور مراکز ”حرم فورم“ میں پرائیوٹ گروپس سے جانے والوں کی تربیت گاہوں کا انعقاد کیا جاتا ہے تاکہ عازمین حج کے مقاصد اور روح کو سمجھتے ہوئے بہتر طریقے سے فریضہئ حج ادا کر سکیں اور بعد از حج اپنے اپنے مقام پر لوٹ کر بہترین کردار ادا کر سکیں۔

بیان کردہ مقاصد اور عہد کی روشنی میں فکری و عملی تبدیلیوں کے لیے حرم فورم قائم کیا گیا ہے تاکہ عازمینِ حج و عمرہ میں پھر سے یہ شعور پیدا کیا جاسکے کہ وہ تاقیامت پیغامِ صداقت کے امین اور وراثتِ نبوی کے حامل ہیں۔ ان ہی نِکات کو پیشِ نظر رکھتے ہوئے ”حرم فورم“ آپ سے تعاون کا خواستگار ہے۔