اپنے معلم کے بتائے ہوئے وقت کے مطابق تیار رہیں ،گو ۸ ذی الحجہ کی صبح بعد نمازِفجر روانگی مسنون ہے ،لیکن حاجیوں کی کثرت اور راستوں میں روکاوٹوں سے بچنے کے لیے جلدی بھی روانہ ہو سکتے ہیں اور فجر کی نماز راستے میں یا منیٰ میں بھی پڑھ سکتے ہیں ۔ منیٰ پہنچنے میں ظہر سے دیر بھی ہو سکتی ہے۔

ذوالحج ۸ کو منیٰ پہنچ کر ظہر ،عصر ، مغرب اور عشاء کی نمازیں ادا کریں۔ اگلے دن فجر کی نماز ادا کریں ۔کثرت سے تلبیہ پڑھتے رہیں ،ذکر اوردعائیں کرتے رہیں ۔

ذوالحج ۹ کی صبح عرفات کے لیے روانہ ہونا ہے ، تلبیہ ، تکبیر، تہلیل کرتے رہیں۔ گو عرفات پہنچنے کا وقت ظہر تک ہے تاہم گاڑیوں کے رش کی وجہ سے دیر لگ جائے تو پریشان نہ ہوں۔

عرفات کے میدان سے مغرب کے بعد مغرب کی نماز پڑھے بغیر روانگی شروع ہو تی ہے ، جیسے جیسے آپ کی بس کا نمبر آئے روانہ ہوں۔اگر پیدل جانا ہے تو غروبِ آفتاب کے بعد روانہ ہو جائیں۔

وقوفِ مزدلفہ کے بعد یا رات کے کسی حصے میں مزدلفہ سے واپس منیٰ کی طرف روانگی ہوگی۔

جن میناروں پر کنکریاں ماری جاتی ہیں انہیں جمرات کہتے ہیں، رمی کے معنی مارنا ہے اور کنکریوں کو جمار کہتے ہیں جن تین مقامات پر رمیِ جمار ہوتی ہے انہیں جمرۂ عقبہ، جمرۂ وسطیٰ، اور جمرۂ اولیٰ یا اُخریٰ کہتے ہیں۔۱۰ ذی الحجہ کو منیٰ پہنچ کر صرف جمرۂ عقبہ کی رمی کرنا واجب ہے۔ مسنون وقت طلوعِ آفتاب سے زوالِ آفتاب تک ہے لیکن سعودی عرب کے علماء کے فتاویٰ کے مطابق مغرب تک بلکہ مغرب کے بعد بھی بلا کراہت جائز ہے۔رمی سے پہلے تلبیہ پڑھنا بند کر دیں(کمزوروں، عورتوں اور بچوں کی طرف سے مرد رمی کر سکتے ہیں) رمی کے لیے کنکریاں مٹر کے دانوں کے برابر ہوں۔ نہ بڑے بڑے پتھر مارنے چاہئیں اور نہ جوتے یا کوئی اور چیز۔ رمی کے وقت اکثر حادثات ہوتے ہیں بہت احتیاط رکھیں جس راستے پر جا رہے ہیں اس پر واپس نہ مڑیں اور نہ ہی نیچے جھکیں۔

آج کل قربانی کی رقم جمع کروا کر ٹوکن مل جاتے ہیں جن پر قربانی کا وقت درج ہوتا ہے، اس وقت تک انتظار کرنے کے بعد حلق/ قصر کروایا جائے۔ وقت معلوم نہ ہو تو رمی کے بعد حلق/ قصر کروا سکتے ہیں۔

عملاً آپ جمرۂ عقبہ کی رمی سے واپس آ کر حلق (سر منڈوانا) یا قصر (بال کم کروانا) کروا لیں۔ یہ یاد رکھیں کہ مردوں کے لیے حلق کروانے کی فضیلت قصر کے مقابلے میں 3 گنا زیادہ ہے۔ اگر پہلے عمرہ کے بعد حلق کروایا تھا پھر بھی دوبارہ استرا پھروانا ہوگا اور اس کا وہی ثواب دوبارہ ہوگا۔ خواتین انگلیوں کی ایک پور کے بقدر بال، سارے بالوں یا کم از کم ایک چوتھائی بالوں میں سے کٹوائیں۔ ایک دوسرے کے بال کاٹ سکتے ہیں کیونکہ احرام سے باہر آنے کا وقت ہے۔ حلق یا قصر کے بعد ناخن بھی ترشوانا مستحب ہے۔

حائضہ خاتون طواف زیارت کے لیے پاکی کا انتظار کرے گی، کیونکہ ایسی حالت میں طواف اور سعی نہیں کی جاسکتی۔چنانچہ ایسے میں طواف زیارت مؤخر کرکے دیگر تمام کام یعنی واپس منیٰ میں قیام اور رمی جمار کیا جا سکتا ہے۔اگر روانگی کی تاریخ فوراً بعد ہو اور پاک ہونے کے بعد طواف زیارت ممکن نہ ہو تو ایسے میں فقہاء کی رائے کے مطابق طواف کرکے ایک بدنہ یعنی اونٹ قربانی دینے سے حج کا رکن ادا ہو جائے گا۔ کچھ فقہا کے نزدیک بدنہ نہ دینا بھی ضروری نہیں ہے۔ اگر کسی کے معاشی حالات اجازت دیں تو قربانی دے دینا بہتر ہے، بصورت دیگر ایسی خاتون اللہ کے نزدیک گناہ گار نہ ہوگی۔

طواف زیارت کے بعد احرام کی پابندیاں مکمل طور پر ختم ہو جائیں گی۔اس کے بعد مسنون طریقے پر سعی ادا کریں۔ فقہاء حنفی کے تحت سعی واجب، الحدیث فقہا کے نزدیک فرض ہے۔(طواف اور سعی کے طریقے کے لیے “عمرہ تربیت” کا پیج دیکھیں)۔

طواف زیارت اور سعی سے فارغ ہوکر منیٰ واپس جا کر قیام کرنا ہوگا۔ بغیر کسی شرعی عذر کے مکہ میں قیام درست نہیں ہے۔

حائضہ خاتون کو طواف وداع کے بغیر مکہ چھوڑنے کی اجازت ہے، اگر اس نے۱۰ ذی الحجہ والا طواف زیارت کر لیا تھا۔